Der Beweis

Endlich hob I an Beweis, dass I wos tua auf da Uni - against all odds ! Wie man sieht hob I mi in Schale geworfen für de Abschlusspräse von "Product und Pricing". De so nebenbei, de beste Präse wor - e kloa ! I glaub a a bissal deswegen, wei unser Tutorin a weng an Stand auf mi hot und mit dem Outfit hob I si a weng beeindruckt/bezaubert. Glaub I jedenfois !
Oba wia ma siagt, nehmans de Leitl auf da NBS/NTU (muass ma net wiassn - is einfoch mei Uni) doch genau so ernst wia mia auf da WU, wanns um große Abschlusspräse geht. Taugt ma - ehrlich jetzt !
Jo des woit I nur amoi gsogt hom, damit do manche unglaubliche, irrwitzige, an den Haaren herbei gezogenen Gerüchte aus der Welt geschafft werden.
Pfiat eich.

Business as usual !

Halli, Halo, Halöle. Nur kurz an Bericht wos si zwischenzeitlich so tuat ! Eigentlich nix Großartiges, sche longsom gehts mit da Uni bergauf.

Soda - Mutschi, bitte den nechsten Absatz überspringa !! - DANKE.

FUUUUUUU bin I gor net gwont, des coole is oba, dass de Singapurianer foigas noch Noten strebern ! Hehehe, und wei I a Austauschstudent bin, gems mir owei de leichten Aufgaben wanns zum Projekteln wird. Juhu !!!
Des hot si bezoit gmocht, dass I am Anfang gsogt hob, I bin nur zum Feiern und Reisn do.

Mutschi, geht scho wieder.

De nechsten Reisn werdn Kuala Lumpur (KL) und Bangkok werdn. Dann im Mai China und Tokyo, Bangkokg again und Kambodscha. I sog nur geilo !
Fuatgeh is guat wia oiwei und schweinsteir wia oiwei. Oba do muass I durch. ;-)
An neichen WG-Kollegen/in griang ma a, wei da Australier 2 Stroßn weiterzogn is. I bin net schuid! Bin scho gsponnt wer einziagt. Und mit meim Buddy wor I a letztens unterwegs. Des is a cooler Hund und er kimt noch Europa im Sommer. Haojie sein Name. Do werd I eich Leitln anfunken, dass erm Wien usw. a weng zoagts, wei der hot sis vadient.
Jo des wors von meiner Seitn, Sauber bleibn !

Vietnam-Hanoi

Von Hue san ma per Flug nach Hanoi. Zimlich miad und fertig ham ma dann nu a Hotel suachan derfen uma 12:00 auf d'Nocht. Des wos mia bucht ham, wor nemli foi. So a Schas. Oiso hams uns von oam Hotel zum nexten gschickt. Do is dann da Schwedin da Fodn grissn, hob net gwusst, dass de Skandinavier so Gas gebn kinan. Letztendlich, dank der Schwedin, san ma in am Sternehotel unterkema, um des söbe Göd wia für des gebuchte Hostel - Hehe, Juhu !
Gschlofn ham ma net fü, wei am nechsten Tog ham boid, wirkli boid ! aufsteh miassn, damit ma zur Halong Bay keman.
Leider wor des Wetter a weng a Schas, sunst warats vielleicht nu besser gwesn ! Klane Rundfohrt in da Bucht, Besichtigung von am schwimmenden Fischhändler und zum Abschluss Rundgang durch de Höhlen. Beeindruckend mehr sog I net !
Zruck noch Hanoi und de restliche Zeit des Tages und des nechsten Tages größtenteils mit Shoppen verbracht. In Vietnam kann ma Mo. - So. shoppen. Seide, Anzüge, Kleidl, Schuach, Brilln, Schmuck, Backpacks (10€), was des Herz begehrt.
Klana Tipp nieeeeeeeeeeeeeeee !! den ersten Preis nema und min. um 30% obahandln, eigentlich 50% oba dann kimst da a bissal schuidig vor. Kost e scho nix und dann handelst as nu soweit oba. Handeln is trotzdem a Gaudi !
Jo und des wors dann mit Vietnam. Wor a geile Reise, würd I sofort wieder mochn !!!

Vietnam-Hue

Nachdem ma ca. 24 Stund durchs Land greist san, san ma dann in Hue, der oiden Hauptstodt ankema. Ham ma natirli sofort den oiden Palast besichtig. Net schlecht wia de oiden Kaiser früher glebt ham. Kann ma si sicha sei, dass dena an nix gföd hot und des Wort Monogamie hams a net kennt. ;-)
De Palastanlage is ungefähr so was wie de verbotene Stadt in China, net ganz so groß, oba immer nu zimlich beeindruckend.
Am nechsten Tog san ma dann mit de Mopeds quer durch Hue Umgebung düst. Kaiserliche Grabstätten, Denkmäler, Tempel etc. anschaun. Des wor ans von de Besten Erlebnisse, vor oim des Mopeddüsn wor a Gaudi. Kann I am jeden nur empfehlen !

Vietnam-Da Lat

Nachdem ma zimlich lang mim Bus gfohrn san, wobei I mi fost angschissn hob - da Busfohrer erstens amoi gfohrn wia a Sau, ohne Scheiss, und zweitens hot a nemli "ganz locker" ca 15 min bergauf an andern Bus überhoit. Links und rechts nu 20cm Plotz und schlussendlich überhoit in da Kurvn, oiso ka Sicht - I leb nu, san ma dann in Da Lat auf d'Nocht ankema.
Am nechsten Tog ham ma dann a Trecking Tour gmocht, jo da Tobi und Sport, oba des stimmt wirklich. Des wor vielleicht geil, abseiln von 20m, im Fluss schwimma, durchan Woid kraxln und dann lecker pickniken auf ana Insel im Fluss. Feinstens !
Am Abend san ma fuat. Do waas I oba nimma so fü. I waas nua, dass ma bei Einheimische gsessn san und de mir an söba branntn Reisschnaps gebn ham. Soit oba zimlich lustig gwen sein, sogn de andern !
Am nechsten Tog wor ma foigas schlecht, Gott sei Dank ham ma do netta a 6 stündige Busfohrt und a 14 stündige Zugfohrt vor uns ghobt. Fu, I sogs eich des wor ka leichte Aufageb mit meim Mogn.

Vietnam-Tunnel von Cu Chi

Am dritten Tog ham ma den hoibaden Tog in Cu Chi vabrocht. Des wor echt interessant. Wir ham an Guide ghobt der Vietnam-Krieg Veteran wor. Bist du deppat, der hot Gschichtln vazöt. Oba der Typ wor echt cool, hot imma an Schmä grissn und oiwei an Smile ghobt, echt beeindruckend. In Cu Chi ham ma dann de Tunnel besichtigt. Zerst mit Einführung wia se de Guerrilla Kämpfa vaschanzt ham, kocht ham, glebt ham, Fallen baut ham,...... Dann ham ma schiassn kina mit olle möglichen Waffen - hob I oba net gmocht; I wor e beim Heer - und dann san ma durch de Tunnel söba graxlt. Ganz sche anstrengend, für de andern. I mit meiner Greß hob do locker nu steh kina in de 80cm - 1m hochn und ca 60cm breitn Tunnel.
Am Nachmittag san ma dann weiter noch Da Lat.

Vietnam-Mekong Delta

Am zweiten Tog san ma zum Mekong Delta gfohrn mim Bus. Bist du narrisch de fohrn wia de gsengtn Sei und Hupen in ana Tour entweder zur Begrüßung von am andern Bus oder vorm Überhoin oder zum Worna vor da Polizei oder einfoch aso. Wir ham uns durtn de Schwimmende Märkte angschaut, worn oba net so berauschend, wei da Morkt in da Frua is (6am) und wir uma 11:oo ankema san. Dann ham ma hoit so a Tour gmocht, wo uns zoagt worn is wias so a Ort Stoiwerk Zuckerl herstön und Zuckerreis und wos da Teifi wos. Dann san ma mim Boot übern Fluss und eini in a Seitenarm, des wor echt cool, weis do siagst wia de Leit wirklich leben. Do ham ma dann wos gessn in am Restaurant, nice. Und zum Schluss san ma donn nu auf an klan Morkt ganga. Auf dem Morkt is dann de Französin, de asiatische Wurzln hot, von ana oiden Vietnamesin angredt worn. De hot gredt und gredt und gredt und hot de Französin nimma weg lossn, dawei vasteht de genau sofü Vietnamesisch wia I. Wor echt witzig.

Vietnam-Saigon

Saigon is a geile Stodt. A jeder fohrt mim Moped und a jeder scheisst auf de Verkehrsregeln. Wannst de Straßn überqueren wüst, muasst guate Nerven hom. De Stadt ansich is anders. Zimlich dreckig, überoi san klane Gschäftl, auf da Straßn kannst ganz normal wos essn, während 1000 Mopeds in 5 min. bei dir vorbeifohrn und ois tourist wirst olle 2 min. gfrogt - Hey dude, Motocycle, where r u going. Geht da mit Zeit a weng am Sack.
Mir hots trotzdem guat gfoin, weis einfoch ganz wos anders is ois wos in Europa gibt bzw. wos I kenn. Und natirli wia fost überoi in Asien - FOIGAS BILLIG ! Juhu.
Insgesamt worn ma 2 Tog in Saigon. Am ersten Tog a weng Sight Seeing innerhoib da Stodt - Stadthalle, Notre Dame Kirchn, Xa-Loi Pagode etc. Wor echt locker, wei ma uns a so an Radlfohrer gemietet ham. Auf d'Nocht san ma dann nu fein Essen und Trinken ganga.